ക്രിസ്‌മസ്‌ രാവിലും സമരവുമായി പുഷ്‌പഗിരിയില്‍ നഴ്‌സുമാര്‍

ലോകമെങ്ങും ക്രിസ്തുവിന്റെ ജനനം ആഘോഷിക്കുമ്പോള്‍ ചെകുത്താന്റെ മനസുമായി ജീവിക്കുന്ന പുഷ്പഗിരിയിലെ അച്ചന്മാരുടെയും കന്യാസ്ത്രീകളുടെയും മനസ്സില്‍ നിന്നും ക്രിസ്തു പടിയിറങ്ങി യിരിക്കുന്നു. ക്രിസ്തുദേവന്റെ പേരില്‍  ഇവര്‍ കാട്ടിക്കൂട്ടുന്നത് എന്തെന്ന് ഇവര്‍ അറിയായ്ക കൊണ്ട്  കര്‍ത്താവു പറഞ്ഞ  പ്രാര്‍ത്ഥന  തന്നെ  നമുക്കും ആവര്‍ത്തിക്കാം."കര്‍ത്താവേ ഇവര്‍ ചെയ്യുന്നത് എന്തെന്ന് അറിയായ്ക കൊണ്ട് ഇവരോട് ക്ഷമിക്കേണമേ!".  തിരുവല്ല: ക്രിസ്‌മസ്‌ രാവു പിന്നിട്ട്‌ പുഷ്‌പഗിരി മെഡിക്കല്‍ കോളജിലെ നഴ്‌സുമാര്‍ നടത്തുന്ന സമരം മൂന്നാംദിവസത്തിലേക്ക്‌. സ്‌റ്റാഫ്‌ നഴ്‌സായി ജോലി ചെയ്‌തിരുന്ന 43 നഴ്‌സുമാരെ മുന്നറിയിപ്പില്ലാതെ പിരിച്ചുവിട്ട നടപടി പിന്‍വലിക്കുക, പുറത്തുനിന്ന്‌ ട്രെയിനിയായി 30 പേരെ നിയമിച്ച നടപടി പിന്‍വലിക്കുക, പുഷ്‌പഗിരിയില്‍ പഠിച്ച്‌ ആറുമാസം ഇന്റേണ്‍ഷിപ്പ്‌ ചെയ്‌തവരെ നഴ്‌സായി നിയമിക്കുക, അപ്പോയ്‌മെന്റ്‌ ലെറ്റര്‍, സാലറി പ്രോമിസറിനോട്ട്‌ സാലറി സ്ലിപ്‌, എക്‌സ്പീരിയന്‍സ്‌ സര്‍ട്ടിഫിക്കറ്റ്‌ എന്നിവ ലഭ്യമാക്കുക എന്നീ ആവശ്യങ്ങളുന്നയിച്ച്‌ കഴിഞ്ഞ ദിവസമാണ്‌ ഓള്‍ ഇന്ത്യ പ്രൈവറ്റ്‌ നഴ്‌സ് അസോസിയേഷന്റെ നേതൃത്വത്തില്‍ പുഷ്‌പഗിരി ആശുപത്രിയിലെ നഴ്‌സുമാര്‍ സമരം തുടങ്ങിയത്‌. രണ്ടുദിവസമായി തുടരുന്ന സമരത്തിന്‌ ഐക്യദാര്‍ഢ്യം പ്രകടിപ്പിക്കാനെത്തിയ ആന്റോ ആന്റണി എം.പി. സമരപ്പന്തലിലെ നഴ്‌സുമാരുടെ എല്ലാ കാര്യങ്ങളും മാനേജ്‌മെന്റുമായി ചര്‍ച്ച നടത്തിയെന്നും ചര്‍ച്ചയ്‌ക്ക് അനുകൂലമായ തീരുമാനമാണ്‌ ആശുപത്രി അധികൃതരുടെ ഭാഗത്തുനിന്ന്‌ ഉണ്ടായിരിക്കുന്നതെന്നും അറിയിച്ചു. എന്നാല്‍ പിരിച്ചുവിട്ട 43 നഴ്‌സുമാരെ തിരിച്ചെടുക്കുമെന്നും ഇവര്‍ക്ക്‌ നേരത്തേ കിട്ടിയിരുന്ന വേതനം തന്നെ ലഭിക്കുമെന്നും അദ്ദേഹം സമരക്കാരെ അറിയിച്ചു. നേരത്തേ കിട്ടിയ തുക മതിയാകില്ലെന്നും സര്‍ക്കാര്‍ അംഗീകരിച്ച വേതനം നല്‍കണമെന്നും നഴ്‌സുമാരെ മാനുഷിക പരിഗണന നല്‍കാതെ മാനേജ്‌മെന്റ്‌ പീഡിപ്പിക്കുയാണെന്നും മതപരമായ അവകാശങ്ങള്‍ പോലും ആശുപത്രിയില്‍ ലഭിക്കുന്നില്ലന്നും ഈ ആവശ്യങ്ങള്‍ നേടിയെടുക്കുന്നതുവരെ സമരം തുടരുമെന്നും പ്രതിനിധികള്‍ അറിയിച്ചു. സി.പി.എം. പത്തനംതിട്ട ജില്ലാ സെക്രട്ടറി കെ. അനന്തഗോപന്‍, ഡല്‍ഹി പ്രൈവറ്റ്‌ നഴ്‌സിംഗ്‌ അസോസിയേഷന്‍. മുംബൈ നഴ്‌സിംഗ്‌ പ്രൈവറ്റ്‌അസോസിയേഷന്‍ എന്നിവര്‍ ഇന്നലെ സമരത്തിന്‌ ഐക്യദാര്‍ഢ്യം പ്രകടിപ്പിച്ചു. സമരം  ചെയ്യുന്ന നഴ്സുമാര്‍ക്ക് ക്രിസ്മസ് പുതു വത്സരാശംസകള്‍! ഒപ്പം വിജയാശംസകളും! (സമരം ചെയ്യുന്നവര്‍ക്കുള്ള മുന്നറിയിപ്പ്:അച്ചന്മാര്‍ക്കും കന്യാസ്ത്രീകള്‍ക്കും മാനസാന്തരമുണ്ടാകാന്‍ കര്‍ത്താവ്‌ നേരിട്ട് വരേണ്ടതിനാല്‍ പുഷ്പഗിരിയിലെ സമരം ഉടനെ തീരുമെന്ന് പ്രതീക്ഷിക്കേണ്ട!)